Walaloo: Roobaa

Toleeraa Fiqiruu Gamtaa irraa*

Roobaa

Gaafa qabsoon haddhoofte

Roobaa, ati Arsii hoggantee

eeboofi gaachana qabattee

diina meeshaa Aurophaa hidhate

kokkee qabdee- boqonnaa dhorkattee

falmii ati bara sani goote

seenaan hin tasa daganne.

Roobaa!

Gaafas, gaafa carraan dudda sitti gattee

gaafa haqni dabdee, bilisummaan cabe

Eyyee gaafas, dhaamsa ati dhalootaaf dhiifte

Seenaan tasa hin daganne, dachiinis hin dhoksine

Roobaa

Gaafa xiiqii san, dachiitti quba qabdee

Onaattee, jagnumaan, kan ati dubbatte

Kunoo akkas jettee;

“lollee hin mo’amnee

lubbuus hin laalannee

meeshaa ammayyaan caalamne

Kanaaf galma hanqanne;

yerootu dudda nutti gate

humna cunqursaaf loogee”

jettee, kan ati dubbatte

dachiin tasa hin dhoksine

Roobaa

Onnattee … ijbaattee … marabbaa gudunfattee

Rajii ati rajjee, Fagootti ilaaltee

Gaafas kunoo akkas jettee;

“halkannis dorrobaa, yeroon kunis ni darbaa

guyyaan tokkoos diddechee ni dhufaa

sababi kufaatii keenyaa– har’aa

meeshaan inni kan ammayyaa

Gaafas ilmaan keenya niga’aa

Egaa falmii inni walqixaa

gaafas haalaan ni geggeefama

Dhugaa baddetu galaa”

jettee kan ati dubbatte

dachiin tasa hin dhokisne.

Robbaa

Har’a osoo kaatee

Kaa itti jirru argitee

Silaa maal jettamee?

_______________________________________________________

Roobaan goota gameeyyii Oromoo horate keessaa isa tokko ture. Bara weerara waraana Miniiliki Roobaan Oromoo Arsii, hogganee falmii seena qabeessa taasise. Kan inni ittiin lole meeshaa waraanaa aadaa (gaacanaafi eeboo) yoo ta’u kan gartuun Miniiliki hidhate garuu meeshaa ammayyaa warra Auroophaa irraa gagaarsan argate ture. Kanaaf Roobaan mo’amuuf dirqame. Gaafas dhalootaaf dhaamsa guddaa dhiisee wareegame. “Har’a meeshaa amayyaa waan of harkaa qabdaniif injifannoo argachuu dandeesanittu. Hata’u malee meeshaan ammayyaa kun bara tokko ilmaan keenya harkas ni gala. Gaafas bilisummaan keenya ni dhugooma” jedhee dhaamsa dabarse.     Source ( http://gadaa.com/oduu/20905/2013/07/22/walaloo-roobaa/ )